ರೂಪೇಶ್ ಶೆಟ್ಟಿ-ಅದ್ವಿತಿ ಶೆಟ್ಟಿ ‘ಲವ್ ಯು’ ಹಾಡಿಗೆ ‘ಜೈ’!
ಹೊರಬಂತು ‘ಜೈ’ ಸಿನೆಮಾದ ಮೆಲೋಡಿ ಲವ್ ಟ್ರಾಕ್
ಅದ್ವಿತಿ ಹಿಂದೆ ‘ಲವ್ ಯು…’ ಎಂದು ಹಾಡುತ್ತಾ ಓಡಾಡಿದ ರೂಪೇಶ್ ಶೆಟ್ಟಿ
ಪ್ರೇಮಿಗಳಿಂದ ಬಿಡುಗಡೆಯಾಯಿತು ‘ಜೈ’ ಚಿತ್ರದ ಪ್ರೇಮಗೀತೆ
ಕನ್ನಡ ಮತ್ತು ತುಳು ಭಾಷೆಯಲ್ಲಿ ಏಕಕಾಲಕ್ಕೆ ನಿರ್ಮಾಣವಾಗುತ್ತಿರುವ ‘ಜೈ’ ಸಿನೆಮಾದ ಮೊದಲ ಪ್ರೇಮಗೀತೆ ಇದೀಗ ಬಿಡುಗಡೆಯಾಗಿದೆ. ಕರ್ನಾಟಕದ ಕರಾವಳಿ ಭಾಗದ ಪ್ರತಿಭೆ ಹಾಗೂ ‘ಬಿಗ್ಬಾಸ್’ ಖ್ಯಾತಿಯ ರಾಕ್ ಸ್ಟಾರ್ 
ರೂಪೇಶ್ ಶೆಟ್ಟಿ ನಟಿಸಿ, ನಿರ್ದೇಶನ ಮಾಡಿರುವ ‘ಜೈ’ ಸಿನೆಮಾದ ಈ ಪ್ರೇಮಗೀತೆಯನ್ನು ಕನ್ನಡ ಹಾಗೂ ತುಳು ಎರಡೂ ಭಾಷೆಯಲ್ಲೂ ಏಕಕಾಲಕ್ಕೆ ಚಿತ್ರತಂಡ ಹೊರತಂದಿದೆ.
ಪ್ರೇಮಗೀತೆಗೆ ‘ಜೈ’ ಎಂದ ಪ್ರೇಮಿಗಳು…
ಇನ್ನು ‘ಜೈ’ ಸಿನೆಮಾದ ‘ಈಗಲೇ ಲವ್ ಯು ಎನ್ನಲೇ’ ಎಂಬ ಸಾಲುಗಳಿಂದ ಆರಂಭವಾಗುವ ಈ ಗೀತೆ ಅಪ್ಪಟ ಪ್ರೇಮಗೀತೆಯಾಗಿದ್ದು, ಈ ಗೀತೆಯನ್ನು ಪ್ರೇಮಿಗಳಿಂದಲೇ ಚಿತ್ರತಂಡ ಬಿಡುಗಡೆ ಮಾಡಿರುವುದು ವಿಶೇಷ. ಸಂಗೀತ ನಿರ್ದೇಶಕ ಗುರುಕಿರಣ್ ದಂಪತಿ, ನಟ ಕಂ ನಿರೂಪಕ ನಿರಂಜನ್ ದೇಶಪಾಂಡೆ ದಂಪತಿ, ಬಿಗ್ಬಾಸ್ ಸ್ಪರ್ಧಿಯಾಗಿದ್ದ ವಿನಯ್ ಗೌಡ ದಂಪತಿ, ರೂಪೇಶ್ ರಾಜಣ್ಣ ದಂಪತಿ ಹಾಗೂ ಆರ್ಯವರ್ಧನ್ ಗುರೂಜಿ ದಂಪತಿಯಿಂದ ಈ ಹಾಡು ಬಿಡುಗಡೆ ಆಗಿದೆ. 
‘ಜೈ’ ಪ್ರೇಮಗೀತೆ ಫೈನಲ್ ಆಗಿದ್ದರ ಹಿಂದಿನ ಸಾಹಸಗಾಥೆ..!
ಇನ್ನು ‘ಜೈ’ ಚಿತ್ರತಂಡ ಹೇಳುವಂತೆ, ‘ಈಗಲೇ ಲವ್ ಯು ಎನ್ನಲೇ…’ ಎಂಬ ಸಾಲುಗಳಿಂದ ಶುರುವಾಗುವ ಈ ಹಾಡನ್ನ ಫೈನಲ್ ಮಾಡುವುದಕ್ಕೇನೆ ಸಾಕಷ್ಟು ಸಮಯ ತೆಗೆದುಕೊಳ್ಳಬೇಕಾಯಿತಂತೆ. ಸುಮಾರು 5 ವರ್ಷನ್ ಕೇಳಿದ ಮೇಲೂ 6ನೇ ವರ್ಷನ್ ಫೈನಲ್ ಮಾಡಲಾಗಿತ್ತು. ಮತ್ತೆ ಮತ್ತೆ ಕೇಳಬೇಕು ಎನ್ನುವಂತ ಫೀಲ್ ಬರಬೇಕು ಎಂಬ ಕಾರಣಕ್ಕೆ ಹಾಡಿನ ಮೇಲೆ ಸಾಕಷ್ಟು ಪರಿಶ್ರಮ ಹಾಕಲಾಗಿದೆ. ಇಷ್ಟು ಅದ್ಭುತವಾದ ಸಾಹಿತ್ಯಕ್ಕೆ ಧ್ವನಿಯೂ ಅಷ್ಟೇ ಚೆನ್ನಾಗಿ ಕೂಡಿದಾಗ ಹಾಡು ಮತ್ತಷ್ಟು ಖುಷಿ ಕೊಡುತ್ತದೆ. ಹೀಗಾಗಿ ಹಾಡುವವರ ಹುಡುಕಾಟ ನಡೆಯುತ್ತಿದ್ದಾಗ ರಜತ್ ಹೆಗ್ಡೆ ವಾಯ್ಸ್ ಚಿತ್ರತಂಡದ ಕಿವಿಗೆ ಬಿದ್ದಿತ್ತು. ಇವರ ಧ್ವನಿ ಪಕ್ಕಾ ಮ್ಯಾಚ್ ಆಗಿತ್ತು. ಹೀಗಾಗಿ ರಜತ್ ಹೆಗ್ಡೆ ‘ಈಗಲೇ ಲವ್ ಯು ಎನ್ನಲೇ…’ ಹಾಡನ್ನ ಹಾಡಿದ್ದಾರೆ.
ಏಕಕಾಲಕ್ಕೆ ಎರಡೂ ಭಾಷೆಗಳಲ್ಲಿ ‘ಜೈ’ ಗೀತೆ…
ಇನ್ನು ‘ಜೈ’ ಸಿನೆಮಾದ ಕನ್ನಡ ಮತ್ತು ತುಳು ಎರಡೂ ಭಾಷೆಗಳಲ್ಲೂ ಏಕಕಾಲದಲ್ಲಿ ಬಿಡುಗಡೆಯಾಗಿದೆ. ‘ಜೈ’ ಸಿನೆಮಾದ ಕನ್ನಡ ಭಾಷೆಯ ಹಾಡಿಗೆ ಕೀರ್ತನ್ ಭಂಡಾರಿ ಸಾಹಿತ್ಯ ರಚಿಸಿದ್ದರೆ, ತುಳು ಭಾಷೆಯ ಹಾಡಿಗೆ ಸ್ವತಃ ನಾಯಕ ನಟ ಕಂ ನಿರ್ದೇಶಕ ರೂಪೇಶ್ ಶೆಟ್ಟಿ ಅವರೇ ಸಾಹಿತ್ಯ ಬರೆದಿದ್ದಾರೆ. ಇನ್ನು ಈ ಹಾಡಿನ ಕನ್ನಡದ ಗೀತೆಯನ್ನು ತುಳು ಭಾಷೆಗೆ ಯಥಾವತ್ತಾಗಿ ತರ್ಜುಮೆ ಮಾಡಿಲ್ಲ, ಹಾಡಿನ ವಿಚಾರಧಾರೆಯನ್ನು ರೆಫರೆನ್ಸ್ ಇಟ್ಟುಕೊಂಡು, ಆ ಭಾವನೆ, ಆ ಮೀನಿಂಗ್ ಎಲ್ಲವನ್ನು ಅಚ್ಚುಕಟ್ಟಾಗಿ ತುಳುವಿನಲ್ಲಿ ಕಟ್ಟಿಕೊಡಲಾಗಿದೆ ಎಂಬುದು ಚಿತ್ರತಂಡದ ಮಾತು. 
ತುಳು ಭಾಷೆಯಲ್ಲಿ ರೂಪೇಶ್ ಶೆಟ್ಟಿ ಅವರು ಕೂಡ ಈ ಹಾಡನ್ನ ಮನಸ್ಸಿಟ್ಟು ಬರೆದಿದ್ದಾರೆ. ಆದ್ರೆ ಬಹಳ ಕಡಿಮೆ ಸಮಯದಲ್ಲಿ ಅದ್ಭುತವಾದ ಪದಗಳು ಬಂದಿದ್ದೇ ರೋಚಕ. ಅದೂ ಕೂಡ ಒಂದೇ ಒಂದು ದಿನದಲ್ಲಿ ‘ಲವ್ ಯು’ ಹಾಡನ್ನು ಬರೆಯಲಾಗಿದೆ ಎಂಬುದು ‘ಜೈ’ ಚಿತ್ರತಂಡ ನೀಡುವ ವಿವರಣೆ.
ರೂಪೇಶ್ – ಅದ್ವಿತಿ ಶೆಟ್ಟಿ ಜೋಡಿಗೆ ‘ಜೈ’
ಇನ್ನು ‘ಜೈ’ ಸಿನೆಮಾದಲ್ಲಿ ನಾಯಕ ನಟ ಕಂ ನಿರ್ದೇಶಕ ರೂಪೇಶ್ ಶೆಟ್ಟಿಗೆ ನಾಯಕಿಯಾಗಿ ನಟಿ ಅದ್ವಿತಿ ಶೆಟ್ಟಿ ಜೋಡಿಯಾಗಿ ತೆರೆಹಂಚಿಕೊಂಡಿದ್ದಾರೆ. ‘ಜೈ’ ಸಿನೆಮಾ ನಟಿ ಅದ್ವಿತಿ ಶೆಟ್ಟಿಗೆ ಮೊದಲ ತುಳು ಸಿನೆಮಾವಾಗಿದ್ದು, ತಮ್ಮ ಮಾತೃಭಾಷೆಯ ಮೊದಲ ಚಿತ್ರದಲ್ಲಿ ಅಬಿನಯಿಸಿದ ಖುಷಿ ಅದ್ವಿತಿ ಶೆಟ್ಟಿ ಅವರಿಗಿದೆ. ಇನ್ನು ‘ಜೈ’ ಸಿನೆಮಾದಲ್ಲಿ ನಾಯಕ ನಟಿ ಅದ್ವಿತಿ ಶೆಟ್ಟಿ ಜರ್ನಲಿಸ್ಟ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ‘ಜೈ’ ಸಿನೆಮಾಕ್ಕೆ ‘ಆರ್.ಎಸ್ ಸಿನಿಮಾಸ್’, ‘ಶೂಲಿನ್ ಫಿಲಂಸ್’, ‘ಮುಗ್ರೋಡಿ ಪ್ರೊಡಕ್ಷನ್’ ಲಾಂಛನದಲ್ಲಿ ಅನಿಲ್ ಶೆಟ್ಟಿ, ಸುಧಾಕರ ಶೆಟ್ಟಿ ಮುಗ್ರೋಡಿ, ಮಂಜುನಾಥ ಅತ್ತಾವರ ಜಂಟಿಯಾಗಿ ಬಂಡವಾಳ ಹೂಡಿ ನಿರ್ಮಾಣ ಮಾಡಿದ್ದು, ದೀಕ್ಷಿತ್ ಸಹ ನಿರ್ಮಾಪಕರಾಗಿದ್ದಾರೆ. 
‘ಜೈ’ ಮೊದಲ ಪ್ರೇಮಗೀತೆ ಬಗ್ಗೆ ನಟ ಕಂ ನಿರ್ದೇಶಕ ರೂಪೇಶ್ ಶೆಟ್ಟಿ ಏನಂತಾರೆ…?
‘ಜೈ’ ಸಿನೆಮಾದ ‘ಲವ್ ಯು’ ಹಾಡಿನ ಬಗ್ಗೆ ಮಾತನಾಡಿರುವ ಚಿತ್ರದ ನಾಯಕ ನಟ ಕಂ ನಿರ್ದೇಶಕ ರೂಪೇಶ್ ಶೆಟ್ಟಿ, ‘ಒಂದು ಹಾಡನ್ನ ಸ್ಪೆಷಲ್ ಆಗಿ ರಿಲೀಸ್ ಮಾಡಬೇಕು ಅಂತ ಅಂದುಕೊಂಡಿದ್ದೆ. ನಾನು ಯಾರನ್ನೆಲ್ಲ ಕರೆದಿದ್ದೆ ಅವರೆಲ್ಲ ಬಂದು ಇವೆಂಟ್ ಅದ್ಭುತವಾಗಿ ಬರುವಂತೆ ಮಾಡುವ ಮೂಲಕ ಶುಭ ಹಾರೈಸಿದರು. ನನ್ನ ಕಾನ್ಸೆಪ್ಟ್ ಇದ್ದದ್ದೇ ರಿಯಲ್ ಲೈಫ್ ನಲ್ಲಿ ಲವ್ ಗೆ ಉದಾಹರಣೆಯಾಗಿದ್ದವರಿಂದ ಹಾಡನ್ನು ರಿಲೀಸ್ ಮಾಡಬೇಕು ಅನ್ನೋ ಆಸೆ ಇತ್ತು. ಅದು ನೆರವೇರಿದೆ. ಹಾಡು ಕೂಡ ಎಲ್ಲರಿಗೂ ತುಂಬಾ ಇಷ್ಟವಾಗಿದೆ. ಅದೇ ರೀತಿ ನಮ್ಮ ಸಿನೆಮಾ ಕೂಡ ಪ್ರೇಕ್ಷಕರಿಗೆ ಇಷ್ಟವಾಗಲಿದೆ’ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
